ისლანდიაში არჩევნების შედეგად მმართველი პარტია ლიდერობს. კონსერვატორები, სავარაუდოდ, ახალი მოწვევის პარლამენტში ყველაზე მეტ დეპუტატს შეიყვანენ.
ამასთან, ჯერ უცნობი რჩება რომელ პარტიებთან ერთად მოუწევს ბიარნი ბენედიკტსონს და მის თანაგუნდელებს კოალიციური მთავრობის ფორმირება.
არჩვენების წინასწარი შედეგების მიხედვით, მეორე ადგილზეა მემარცხენე პარტია, რომელსაც სათავეში კატრინ იაკობსდოტირი უდგას. მესამეზე არიან სოციალ-დემოკრატები.
ისლანდიაში საპარლამენტო არჩევნები ბოლო ერთ წელიწადში მეორედ იმართება. ამის მიზეზი პოლიტიკური კრიზისია, რომელიც მას შემდეგ დაიწყო, რაც მმართველი პარტია სკანდალში გაეხვა. კერძოდ, საქმე ეხება კონსერვატორების ლიდერ ბიარნი ბენედიკტსონის მამას, რომელმაც პედოფილიაში ბრალდებული პირისთვის ჩამორთმეული უფლებების აღდგენა მოითხოვა.
ისლანდიაში მოქმედი კანონით, მსგავს დანაშაულში ბრალდებულს ჩამორთმეული უფლებების აღდგენა იმ შემთხვევაში შეუძლია, თუ მას მხარს სამი ადამიანი მაინც დაუჭერს.
როგორც მოგვიანებით გახდა ცნობილი, ისლანდიის მმართველი პარტიის ლიდერის მამამ დადებითი რეკომენდაცია გაუწია ხუთი წლის გერის გაუპატიურებაში ბრალდებულ პირს. ამ ინფორმაციამ ისლანდიელები განარისხა, რის გამოც მათ ვადამდელი არჩევნების დანიშვნა მოითხოვეს.