ესპანეთის ხელისუფლების მიერ გადაყენებული კატალონიის რეგიონული მთავრობის წევრები ბრიუსელიდან ბარსელონაში დაბრუნდნენ. მთავრობის ყოფილი მეთაური კარლეს პუიჩდემონი კი კვლავ ბელგიაში იმყოფება.
აეროპორტში ყოფილ მინისტრებს ესპანეთის ერთიანობის მომხრეები შეძახილებით და ესპანეთის დროშებით დახვდნენ.
კატალონიის რეგიონული მთავრობის ყოფილმა ლიდერმა 31 ოქტომბერს, ბრიუსელში გამართულ პრესკონფერენციაზე განაცხადა, რომ ბელგიაში თავშესაფრის მისაღებად არ ჩასულა.
პუიჩდემონმა ასევე აღნიშნა, რომ იგი მზად არის, სასამართლოს წინაშე წარდგეს, თუმცა არ არის დარწმუნებული, რომ სასამართლო პროცესი მიუკერძოებლად წარიმართება.
კატალონიის ყოფილი მთავრობის 14 წევრის წინააღმდეგ სისხლის სამართლის საქმეა აღძრული. მათ ბიუჯეტის არამიზნობრივად გახარჯვასა და დაუმორჩილებლობასა და ამბოხების მცდელობაში ედებათ ბრალი.