კიევში პარლამენტის შენობის წინ საპროტესტო აქცია მიმდინარეობს. დღეიდან უკრაინის რადაში პლენარული სხდომების კვირა დაიწყო, „ახალ ძალთა მოძრაობის“ მიერ ორგანიზებულ მიტინგზე ხელისუფლებას ქმედითი რეფორმების გატარებისკენ და კანონმდებლობის ცვლილებისკენ მოუწოდებენ.

აქცისს მონაწილეთა მოთხოვნებია: ანტიკორუფციული სასამართლოს შექმნა, დეპუტატებისთვის იმუნიტეტის მოხსნა, საარჩევნო კანონის ცვლილება. ამასთანავე აქციის მონაწილეები შინაგან საქმეთა მინისტრის არსენ ავაკოვის გადადგომასაც მოითხოვენ, რომლის შვილის რამდენიმე დღის წინ კორუფციულ სქემებში მონაწილეობის ბრალდებით დააკავეს.

„ავაკოვი ჩვენ ნაგვად გვთვლის, პოროშენკო კი ფიქრობს, რომ ყველას ყიდვა შეუძლია. ამჯერად ჩვენ დაწყებულ რევოლუციას ბოლომდე მივიყვანთ.“- აცხადებენ აქციის მონაწილეები.

აქციაზე სიტყვით გამოვიდა მიხეილ სააკაშვილიც, მან უკრაინაში ხელისუფლების ცვლილების აუცილებლობაზე ისაუბრა:

„დღეს ხანგრძლივი პაუზის შემდეგ მათ მხოლოდ საარჩევნო კანონმდებლობის განხილვა გადაწყვიტეს და დანარჩენი საკითხები, ანტიკორუფციული სასამართლო და იმუნიტეტის მოხსნა გადადეს. მათ მოგვატყუეს და შეხვედრაც კი არ უნდათ, დღეს მათ ბოლო დღე აქვთ. თუ არაფერი არ შეიცვლება, საღამოს ჩვენ ახალი გეგმა უნდა გვქონდეს. ჩვენი გეგმა იქნება ხელისუფლების ყველა დონეზე შეცვლა. უნდათ მილიონიანი მარში? მიიღებენ. თითოული თქვენგანი პროფესორი და აკადემიკოსია, ისინი კი ოროსნები არიან, რომლებიც თავიანთ „შპარგალკებს“ ჩასჩერებიან. 18 საათზე, როდესაც ისინი რადადან გამოვლენ, გამოცდა უნდა ჩაგვაბარონ. ამის მიხედვით შევათანხმებთ სამომავლო გეგმას.“- განაცხადა მიხეილ სააკაშვილმა.