სასტუმრო „ქორთიარდ მარიოტში“ DEEP (თავდაცვის განათლებისა და განვიტარების პროგრამა) და PfP consortium (პარტნიორობა მშვიდობისათვის პროგრამა) წარმომადგენლების მიერ სერჟანტთა სამუშაო შეხვედრა გაიხსნა. სამუშაო შეხვედრის მონაწილეებს სიტყვით საქართველოს შეიარაღებული ძალების გენერალური შტაბის უფროსმა, გენერალ-მაიორმა ვლადიმერ ჩაჩიბაიამ მიმართა და სერჟანტთა განათლების მნიშვნელობაზე გაამახვილა ყურადღება. კონფერენცია - „პრობლემები და მათი გადაჭრის გზები სერჟანტთა შემადგენლობისათვის, 21-ე საუკუნის გამოწვევებთან მიმართებაში" 15 მარტამდე გაგრძელდება.
შეხვედრის მიზანი მონაწილე ქვეყნების მიერ სერჟანტთა განათლების სისტემაში განხორციელებული რეფორმების ერთმანეთთან გაზიარება და არსებული პრობლემების განხილვაა. შეხვედრის დასასრულს DEEP-ის ჯგუფის ექსპერტების მიერ გამოვლენილი პრობლემების გადასაჭრელად რეკომენდაციები შემუშავდება.
სამუშაო შეხვედრაში საქართველოს, უკრაინის, მოლდოვას, ყაზახეთის, მონღოლეთის, ტუნისისა და უზბეკეთის შეიარაღებული ძალების წარმომადგენლები, ასევე ექსპერტები აშშ-დან, კანადიდან, ლიტვიდან და სლოვენიიდან მონაწილეობენ.