რუსეთის მიერ საქართველოს ოკუპირებული ტერიტორიების ზოლზე სამოქალაქო მონიტორინგის მისიის ამსახველი და მხარდამჭერი ფეისბუკ ჯგუფი „ძალა ერთობაშია“ ვიდეოკადრებს ავრცელებს, სადაც ასახულია ახმაჯის საოკუპაცო ბაზიდან ტრანსპორტის გადაადგილება. როგორც გავრცელებულ ინფორმაციაშია ნათქვამი ახალი საკონტროლო-გამშვები პუნქტის მოსაწყობად ოკუპანტებს შესაბამისი მასალა გადააქვთ, საბოლოო მიზანი კი ოკუპირებული ახალგორის მთლიანად ჩაკეტვაა:
„ყურადღება! ინფორმაცია იმის შესახებ, რომ ოკუპანტები ახალგორის მთლიანად ჩაკეტვას აპირებენ, რაზეც "ძალა ერთობაშია" ცოტა ხნის წინ აკეთებდა განცხადებებს, დასტურდება.

ჩვენი ინფორმაციით, დღეს დილით, ახმაჯის საოკუპაციო ბაზიდან ახალგორის მიმართულებით უნდა დაძრულიყვნენ ოკუპანტები, რომლებიც შლაგბაუმებს, ბანერებსა და საგზაო მონიშვნებს წაიღებდნენ ახალი საკონტროლო-გამშვები პუნქტის მოსაწყობად.

ჩვენი ჯგუფი დილის 05:30-დან აკვირდებოდა ახმაჯის საოკუპაციო ბაზას და ეს პროცესი გადაიღო. “- ნათქვამია „ძალა ერთობაშია“-ს მიერ გავრცელებულ ინფორმაციაში.