გაერთიანებული ოპოზიცია დმანისში ჩავიდა. ამზომველები დღეს იმ 16 ჰექტარ მიწის ფართობს აზომავენ, რომელიც „დმანისის გადარჩენის ფონდმა“ აუქციონის გზით გასულ თვეს შეიძინა. ამზომველები და ოპოზიციური პარტიების წარმომადგენლები უშუალოდ იმ ტერიტორიაზე იმყოფებიან, რომელიც მათ იჯარით შეიძინეს. ტერიტორიაზე შესულ გაერთიანებულ ოპოზიციას სახელმწიფოს კუთვნილ ტერიტორიაზე კომპანია RMG Gold-ის კუთვნილი ტექნიკა და დანადგარები დახვდათ. ოპოზიციის წარმომადგენლების განცხადებით, აღნიშნული აფქტი არს კანონდარღვევა რაც მიუთითებს იმაზე, რომ სახელმწიფო კომპანიასთან გარიგებაშია და ამ ფაქტის გამო სისხლის სამართლის საქმე უნდა აღიძრას: „დღესვე არის აღსაძრავი სისხლის სამართლის საქმე, პირველ რიგში იმ 16 ჰექტარზე, რომელიც არ ეკუთვნოდა არასდროს RMG-ს, განლაგებულია სხვადასხვა სახის დანადგარები უკანონოდ და სხვა ტერიტორიაზე, რომელიც სახელმწიფო ტერიტორიაა, ვხედავთ დანადგარებს, რომლებიც არის სამთო მასების სამტვრევი დანადგარები, წლების განმავლობაში RMG აწარმოებს სახელმწიფოს კუთვნილ ტერიტორიაზე უკანონო საქმიანობას. მხოლოდ ეს ორი მიზეზი საკმარისია, რომ დღეს, დღის ბოლომდე ნებისმიერმა დამწყებმა პროკურორმა აღძრას საქმე და კიდევ ერთხელ დადასტურდა, რომ rmg არის დანაშაულებრივი და მაფიოზურ-კლანური ორგანიზაცია“, - განაცხადა ნიკა მელიამ.

გიორგი ვაშაძე აცხადებს, რომ ხელისუფლებასაც და კომპანიასაც ყველა უკანონობაზე პასუხის გაცემა მოუწევს:

„პირველივე შემოსვლით, პირველივე ნაბიჯით ამ ტერიტორიაზე დავადგინეთ უკანონობა, ერთი, რომ შემოჭრილი არიან იმ ტერიტორიაზე, სადაც ჩვენ აუქციონი მოვიგეთ და მეორე, რომ ეს ტერიტორია არის სახელმწიფოს საკუთრება, ყველაფერი დგას აბსოლუტურად უკანონოდ, ერთ-ერთი მთავარი ღერძი მათი წარმოების აბსოლუტურად უკანონოდ არის აქ გაშენებული. ეს მიუთითებს RMG Gold-ისა და ხელისუფლების გარიგებას, როცა ხალხი არ აინტერესებთ, არაფერი აინტერესებთ და აბსოლუტურად უკანონოდ აკეთებენ ყველაფერს, ყველა ამ საკითხზე მოუწევთ პასუხისგება“, - აღნიშნავს გიორგი ვაშაძე.