თბილისის საკონცერტო დარბაზში სტეფანეს კონცერტმა მორიგი ანშლაგით ჩაიარა. მომღერალმა ცნობილი, განახლებული ჰიტები მაყურებლის წინაშე ახალი არანჟირებით შეასრულა.
გუშინდელი სტეფანეს კონცერტი მისი 20 წლიანი კარიერის შეჯამება იყო, რომელშიც მონაწილეობა ქართველმა მომღერლებმაც მიიღეს.

ფილარმონიის სცენაზე სტეფანეს ბექ-ვოკალთან ერთად, მაია დარსმელიძე, ქეთათო ჩარკვიანი, აჩიკო სოლოღაშვილი, ერეკლე დეისაძე, ლელა წურწუმია, ქრისტინე იმედაძე, ნინი ბადურაშვილი და თაკო გაჩეჩილაძე წარსდგნენ.

სტეფანემ საკუთარ შემოქმედებას თავიდან გადახედა, 90-იან წლებში დაწერილი სიმღერები და დუეტები, რომელიც მოგვიანებით ჩაიწერა, კონცერტზე განსხვავებული ფორმით გააჟღერა. მომღერლის 20 წლიანი შემოქმედება ელექტრონული მუსიკის, პოპის, ბლუზის, დისკოსა და ფანქის ორიგინალური ნაზავია, რომელსაც თან მისი ინდივიდუალური, ადგილობრივი სცენისთვის სრულიად ახლებური იმიჯი ერთვის.