საქართველოს თავდაცვის მინისტრის პირველმა მოადგილემ ნიდერლანდების სამეფოს დელეგაციას უმასპინძლა. ლელა ჩიქოვანმა ნიდერლანდების საგარეო საქმეთა სამინისტროს თავდაცვისა და უშიშროების დეპარტამენტის დირექტორის მოადგილეს, ბას ველსსა და ნატოში ნიდერლანდების წარმომადგენლობის პირველ მდივანს, ანა ვან ზუსტს საქართველოს მიმართ პოლიტიკური და პრაქტიკული მხარდაჭერისთვის მადლობა გადაუხადა და თავდაცვის სფეროში თანამშრომლობის გაღრმავების იმედი გამოთქვა.
ლელა ჩიქოვანმა სტუმრებს საქართველოს თავდაცვის უწყებაში მიმდინარე ტრანსფორმაციის პროცესი, ეროვნული თავდაცვის პოლიტიკის პრიორიტეტები და განხორციელებული რეფორმები გააცნო. ქვეყნის საგარეო პრიორიტეტზე საუბრისას, მინისტრის მოადგილემ ნატოსთან თავსებადობის გაზრდის კუთხით მიღწეული პროგრესი აღნიშნა და ნატო-საქართველოს არსებითი პაკეტის (SNGP) განხორციელების პროცესში ნიდერლანდების ჩართულობაზე გაამახვილა ყურადღება. მხარეებმა სამხედრო განათლების საკითხებსა და მრავალეროვნულ სამხედრო სწავლებების მნიშვნელობაზე იმსჯელეს. „ნატო-საქართველოს სწავლება 2019“-ში, რომელიც საქართველოში მომავალი წლის მარტში ჩატარდება, ნიდერლანდების სამეფო ექვსი ოფიცრით იქნება წარმოდგენილი.
თავდაცვის სამინისტროში გამართულ შეხვედრაზე თავდაცვის ინსტიტუციური აღმშენებლობის სკოლასა (DIBS) და ნიდერლანდების სამეფოს კლინგენდაელის საერთაშორისო ურთიერთობების ინსტიტუტს შორის არსებულ მჭიდრო თანამშრომლობზეც ისაუბრეს.
შეხვედრას საქართველოში ნიდერლანდების ელჩი იოჰანეს დაუმა და მისი მოადგილე, ლუს ლამერტსი დაესწრნენ.