მთავრობის პრესსამსახურის ინფორმაციით, კორონავირუსის გავრცელების შედეგად ეკონომიკაზე გამოწვეულ ეფექტს ეკონომიკის სამინისტრო დაიანგარიშებს. გაზრდილია გაუთვალისწინებელი ხარჯებიც, შემოსავლების სამსახური სასაზღვრო პუნქტებზე საკარანტინო კონტროლის გამკაცრების მიზნით სამედიცინო ინვენტარის შესყიდვას გეგმავს. გამარტივებული შესყიდვის თაობაზე სამსახურის განცხადება ჯერ განხილვის პროცესშია. შესყიდვის ღირებულება 357 095 ლარია. ახალ კორონავირუსთან საბრძოლველად საქართველოს მთავრობის სარეზერვო ფონდიდან ჯანდაცვის სამინისტროს 1 მილიონი ლარი გამოეყო. განკარგულება, რომელსაც ხელს პრემიერ-მინისტრი გიორგი გახარია აწერს, 30 იანვრით თარიღდება. თუმცა ამ ხარჯებთან ერთად უფრო საინტერესო ის დანაკლისია, რომელიც ფაქტობრივად მთელი მსოფლიოსთვის გამოწვევად დამდგარ რეალობას შეიძლება მოჰყვეს.

მაგალითად მხოლოდ ჩინეთთან დაკავშირებულ მონაცემებს რომ ჩავხედოთ, 2019 წელს, საქართველოს ჩინეთთან $660 მლნ უარყოფითი საგარეო ბალანსი ჰქონდა. ჩინეთიდან მიღებული შემოსავლები საქართველოს მთლიანი საგარეო შემოსავლების 3% და მშპ-ის 1.7%-ია.

შემოსავლის წყარო იყო:
- ექსპორტი $228 მლნ (აქედან $172 მლნ იყო სპილენძის რეექსპორტი)
- ტურიზმი $30 მლნ
- FDI $36 მლნ (9M19)
- ფულადი გზავნილები $1 მლნ.
აღნიშნული შემოსავლები ბოლო 5 წლის განმავლობაში $100 მლნ-ით გაიზარდა. თუმცა, თუ ექსპორტიდან სპილენძის რეექსპორტს ამოვიღებთ, მაშინ 2019 წელს ჩინეთიდან შემოსავლები $70 მლნ შემცირდა 2015 წელთან შედარებით. გასავალი. 2019 წელს საქართველომ ჩინეთიდან $859 მლნ იმპორტი განახორციელა (მშპ-ის 9.5%). იმპორტი მოიცავს ძირითადად ტექნიკას და სხვა არასაკვებ პროდუქციას.
კორონავირუსის საფრთხიდან გამომდინარე მოსალოდნელია რომ საკვები პროდუქტების იმპორტი შემცირდეს ჩინეთიდან, რაც ადვილად ჩანაცვლდება მეზობელი ქვეყნებიდან. მაგრამ რა მოხდება თუ ვირუსი გრძელ ვადაში პრობლემურ სტატუსს შეინარჩუნებს?

სტუმარი: ოთარ ნადარაია - "თიბისი ჯგუფი", მთავარი ეკონომისტი


#ახალიამბები #BusinessMediaGeorgia