#ახალიამბები
ბათუმის ბულვარში მომხდარ ტრაგედიასთან დაკავშირებით დაკავებულს ბრალი წარედგინა. პროკურატურის ინფორმაციით, პირმა, რომელიც ე.წ. გასაბერი ბატუტის კონსტრუქციის მოწყობის, ექსპლუატაციის და უსაფრთხოების წესების დაცვაზე იყო პასუხისმგებელი, მასზე დაკისრებული მოვალეობები არაჯეროვნად შეასრულა. „კერძოდ, მყარ ზედაპირზე არსებულ სამაგრებზე ბატუტის მიბმა წესების დარღვევით განახორციელა. შედეგად, ატრაქციონი, რომელზეც ორი მცირეწლოვანი ერთობოდა, ქარმა რამდენიმე ათეული მეტრის მოშორებით გადაისროლა. მიღებული დაზიანებების შედეგად ერთ-ერთი ბავშვი საავადმყოფოში მიყვანისთანავე გარდაიცვალა. დაკავებულს ბრალდება საქართველოს სისხლის სამართლის კოდექსის 240 -ე მუხლის მეორე ნაწილით წარედგინა. პროკურატურამ, მისთვის აღკვეთის ღონისძიების სახით პატიმრობის გამოყენების შუამდგომლობით, ბათუმის საქალაქო სასამართლოს უკვე მიმართა.