„საჯარო შესყიდვების შესახებ“ კანონით გათვალისწინებული ძირითადი დებულებების ამოქმედების თარიღად ნაცვლად 2025 წლის 1 იანვრისა, 2027 წლის 1 იანვარი განისაზღვრა - პარლამენტმა დაჩქარებული წესით შესულ ცვლილებებს მხარი დაუჭირა.

კანონი, რომელიც პარლამენტმა 2023 წელს დაამტკიცა მომავალი წლის იანვრიდან უნდა შესულიყო ძალაში. ცვლილებების 2 წლით გადავადების მიზეზად ის ასამდე შენიშვნა და კომენტარი დასახელდა, რომელიც ჩარჩო კანონთან მიმართებით ევროსტრუქტურებს ჰქონდათ.

"ევროპული მხარის მიერ გამოკვეთილია ასამდე კონკრეტული შენიშვნა და კომენტარი, რომელთა ანალიზის შედეგად, მიზანშეწონილია, მომზადებულ იქნეს არსებული კანონის არსებითად გადამუშავებული ვერსია, რომელშიც ასახვას პოვებს ასევე ე.წ. „კომუნალური სექტორის“ და „თავდაცვისა და უსაფრთხოების სექტორის“ შესყიდვების ახალი რეგულაციები", - წერია განმარტებით ბარათში.

შესყიდვების სააგენტოს განმარტებით, აღნიშნული ვადა საჭიროა იმისათვის, რათა უზრუნველყოფილ იყოს როგორც შესაბამისი ნორმატიული შინაარსის ცვლილებების მომზადება, ასევე სახელმწიფო სექტორისა და ბიზნეს საზოგადოების ინფორმირებულობა, შესაბამისი სასწავლო კურსების ჩატარება, სახელმძღვანელოებისა და ინსტრუქციების შემუშავება, ელექტრონული სისტემის მოდერნიზება, საჯარო შესყიდვების პროცესში ჩართულ და იმავდროულად „ელექტრონული მთავრობის“ სერვისის მიმწოდებელ მრავალ სახელმწიფო უწყებასთან სათანადო ელექტრონული სერვისების აწყობა/გამართვა.

შესყიდვების შესახებ კანონი ერთ–ერთი ის კანონია, რომელზეც მუშაობა უკვე რამდენიმე წელია მიმდინარეობს – რატომ ვერ ტარდება რეფორმა?

სტუმარი: ირაკლი აბესაძე - ააიპ "სამოქალაქო მონაწილეობის ცენტრი", ხელმძღვანელი

#საქმიანიდილა-ს #ანალიტიკა ელენე კვანჭილაშვილთან ერთად

#ახალიამბები #BusinessMediaGeorgia