საქართველოს ინოვაციებისა და ტექნოლოგიების სააგენტოს დამფუძნებელი და საქართველოს ეროვნულ ბანკში რეგისტრირებული პირველი ვენჩურული ფონდის, Future Lab-ის მმართველი პარტნიორი, ირაკლი ქაშიბაძე BMG-ის ეთერში ქვეყანაში არსებულ ვითარებას ეხმაურება და არსებული ვითარების ანალიზისთვის “ქართულ ოცნებას” ხელოვნური ინტელექტის გამოყენებას ურჩევს. ირაკლი ქაშიბაძე განმარტავს, რომ კრიზისის დროს ინოვაციური სექტორი უფრო, როგორც წესი, მდგრადობას ინარჩუნებს, რასაც უკრაინის და ისრაელის მაგალითები ადასტურებს. მისივე თქმით, იმ დროს, როცა ქვეყანა გლობალური გამოწვევებისთვის უნდა მოემზადოს, დრო და ენერგია შიდა საკითხების მოგვარებაზე იხარჯება.
Future Lab-ის მმართველი პარტნიორის, ირაკლი ქაშიბაძის შეფასებით, საქართველოში დღეს უმძიმესი კრიზისია, რომელიც ეკონომიკის ყველა დარგზე მოქმედებს. სტარტაპები და IT სფეროს წარმომადგენლები, მართალია, ასეთ დროს, მეტად მოქნილები არიან, ვიდრე მათი კოლეგები და თუ საქართველოს იმიჯი მკვეთრად დაზიანდა, ისინი ქვეყანას დატოვებენ. ტვინების და ინოვაციური კომპანიების გადინება კი, მისი შეფასებით, ისევ და ისევ საქართველოს ეკონომიკას დააზარალებს.

#ახალიამბები #BusinessMediaGeorgia