საქართველოს ენერგეტიკის განვითარების ფონდი "ბორჯომი ჰესის" რეაბილიტაციას და მისი სიმძლავრის გაზრდას გეგმავს. ჰიდროელექტროსადგურის საპროექტო-კვლევით სამუშაოებს "გროს ენერჯი ჯგუფი" ახორციელებს. ეს ინფორმაცია bm.ge-მ დაახლოებით, ერთი თვის წინ გაავრცელა. ზუსტი წარმოდგენა რომ გქონდეთ, ეს არის მდინარე ბორჯომულაზე აგებული ჰესი, რომელიც 1898 წელს ამუშავდა და ერთ-ერთი პირველი იყო რუსეთის იმპერიაში, პეტერბურგისა და ახალი ათონის ჰესების შემდეგ. ობიექტმა ელექტროენერგიის გამომუშავება 1950 წელს შეწყვიტა და მას შემდეგ ასეა გაჩერებული. როგორც კი ეს სიახლე გავავრცელეთ, ჩვენ დაგვიკავშირდა მოქალაქე გივი ცინცაბაძე. ის წარმოადგენს კომპანიას „ნადარბაზევი“. მან აგვიხსნა, რომ ბორჯომი ჰესის რეაბილიტაციის პროექტზე ჯერ კიდევ 1998 წლიდან მუშაობს და დაახლოებით, 100 ათას დოლარამდე ინვესტიცია უკვე განახორციელა. ცხადია, მას ყველაფრის დამადასტურებელი დოკუმენტაცია აქვს, ჰესის რეაბილიტაციისთვის შესაბამისი მიწის ნაკვეთით სარგებლობის უფლების დამადასტურებელი დოკუმენტის ჩათვლით, რაც 1998 წელს, სახელმწიფო მინისტრის გადაწყვეტილებით მიიღო. ამას პროექტის ტექნიკურ-ეკონომიკური კვლევები, ბიზნეს გეგმის დაწერა და დაფინანსების ალტერნატიული წყაროების ძიება მოჰყვა.