ავსტრიელი მხატვრის, გუსტავ კლიმტის დაუმთავრებელი ნახატი - ფროილაინ ლიზერის პორტრეტი, ვენის აუქციონზე 30 მილიონ ევროდ გაიყიდა. აუქციონის ორგანიზატორის, ვენის აუქციონის სახლ im Kinsky-ის თანახმად, ნახატი ჰონგ-კონგელმა მყიდველმა შეიძინა.

ნახატი თითქმის ასი წლის განმავლობაში ითვლებოდა დაკარგულად. კლიმტს ეს პორტრეტი ებრაელი მრეწველების ოჯახმა 1917 წელს, მხატვრის გარდაცვალებამდე ერთი წლით ადრე, შეუკვეთა. ბოლოს საზოგადოებამ ის გამოფენაზე 1925 წელს ნახა. ვენის აუქციონის სახლმა im Kinski-მ მიმდინარე წლის იანვარში გამოაცხადა, რომ ნახატი ნაპოვნია და მას აუქციონზე გამოიტანდნენ. 1925-1961 წლებში ნახატის ბედი გაურკვეველი იყო. როგორც im Kinsky-ში აცხადებენ, 1960-იანი წლებიდან ტილომ სამი მფლობელი შეიცვალა მემკვიდრეობით. თუ ვინ იყო ნახატის ბოლო მფლობელი, ამ დრომდე არ არის ცნობილი.

#ახალიამბები #BusinessMediaGeorgia