დღეს დილით ნაციონალურ საკალათბურთო ასოციაციაში რეგულარული სეზონის, 6 შეხვედრა ჩატარდა.

ყველაზე საინტერესო და შედეგიანი "კლივლენდის" და "ბოსტონის" დაპირისპირება გამოდგა. ქიქენ ლოანს არენაზე გამართული თამაში "კავალიერსმა", ექვსი ქულის სხვაობით, ანგარიშით 124-118 მოიგო.

აღსანიშნავია, რომ ბოლო მეოთხედის წინ მასპინძლები 18 ქულით იგებდნენ და ბოლოს ოდნავ მოეშვნენ, რითაც "სელტიქსმა" მაინც ვერ ისარგებლა.

მატჩის ბომბარდირი კაირი ირვინგი გახდა, რომელმაც 32 ქულა გააკეთა. 30 ქულა და 15 მოხსნაა კევინ ლავის მონაგარი.

ლებრონ ჯეიმსმა კი 23 ქულა, 11 ზუსტი პასი და 8 მოხსნა მიითვალა აქტივში.

"კლივლენდ კავალიერსი" აღმოსავლეთ კონფერენციაში კვლავ პირველი გუნდია. მოქმედი ჩემპიონი მორიგ შეხვედრას პირველ იანვარს "შარლოტ ჰორნეტსის" წინააღმდეგ ჩაატარებს.