ევროპის საფეხბურთო სტადიონებზე, გუშინ, სათასო შეხვედრები გაიმართა. ინგლისში, ქვეყნის ლიგის თასზე, პირველი ნახევარფინალური მატჩი ჩაატარეს, „მანჩესტერ იუნაიტედმა" და „ჰალ სიტიმ".

ოლდ ტრაფორდზე ფავორიტი ჟოზე მოურინიოს გუნდი გახლდათ. მანჩესტერელებმა ეს სტატუსი გაამართლეს და მეტოქეს 2-0 მოუგეს. უგოლო პირველი ტაიმის შემდეგ, მასპინძლები 56-ე წუთზე ხუან მატამ დააწინაურა. მეორე და თამაშის უკანასკნელი გოლი, მარუან ფელეინიმ 87-ე წუთზე გაიტანა. ამ წყვილის საპასუხო თამაში 26 იანვარს ჰალის სტადიონზე შედგება. მეორე ნახევარფინალში, ურთიერთობას „საუთჰემპტონი" და „ლივერპული“ გაარკვევენ.

იტალიის თასის გათამაშების მეოთხედფინალში ითამაშებს ნაპოლი, რომელმაც გუშინ, საკუთარ სანპაულოზე ქვედალიგოსანი „სპეცია" ანგარიშით 3-1 დაამარცხა.

სამხრეთ იტალიური კლუბი მალევე დაწინაურდა. მესამე წუთზე თავი პოლონელმა ნახევარმცველმა, პიოტრ ზელინსკიმ გამოიჩინა. სტუმრებმა 35-ეზე გაათანაბრეს, გოლის ავტორი, ანტონიო პიკოლო გახლავთ. ტაიმი ფრედ დასრულდა. მეორე ნახევრის სტარტზე ორი წუთის ინტერვალში, ნეაპოლელებმა ორი ბურთი გატანა შესძლეს. ჯერ ემანუელე ჯაკერინიმ დაარტყა ზუსტად, ხოლო მატჩს საბოლოო წეტილი, მანოლო გაბიადინიმ დაუსვა. „ნაპოლი" თასის მეოთხედფინალში, ფიორენტინა-კიევოს წყვილის გამარჯვებულს შეხვდება.