ტურინის „იუვენტუსმა“ იტალიის ჩემპიონატის მიმდინარე სეზონში მე-19 მატჩი მოიგო. გათამაშების ლიდერმა, სერია “ა”-ს 23 ტურის გამოტოვებულ შეხვედრაში, სტუმრად, აუტსაიდერი „კროტონე“ დაამარცხა. მთავარი მოვლენები თამაშის მეორე ტაიმში განვითარდა.

მე-60 წუთზე ანგარიში ხორვატმა თავდამსხმელმა მარიო მანძუკიჩმა გახსნა, რასაც 14 წუთში, არგენტინელი ფორვარდის, გონსალო იგუაინის გოლი მოჰყვა. საბოლოოდ, 2-0 იუვეს სასარგებლოდ. მასიმილიანო ალეგრის გუნდი 57 ქულით, სატურნირო ცხრილში პირველ ადგილზეა და უახლოეს მდევარს, რომას 7 ქულით უსწრებს.

ტურინელები მორიგ შეხვედრას სერია “ა”-ს ეგიდით, 12 თებერვალს, კალიარის წინააღმდეგ, სარდინიაზე ჩაატარებენ.