საზოგადოებრივი მაუწყებლის პირველი არხის 13 გადაცემა შესაძლოა დაიხუროს. მათ შორისაა ,,რეალური სივრცე”, პოლიტიკური თოქ-შოუ ,,მთავარი”, "წითელი ზონა", "უცნობი მუსიკა".
ყველა მათგანი მენეჯმენტის მიერ სამ ჯგუფად დაყოფილი გადაცემების ე.წ. მესამე ზოლში მოხვდა, რომელთა რეიტინგი ტელევიზიის საშუალო რეიტინგს ქვემოთაა.
ამავე გეგმის მიხედვით, პირველ და მეორე ზოლში შესული 14 გადაცემა საეთერო ბადეში დარჩება. ხედვაში წერია, რომ გადაცემების ჯგუფებად დაყოფის დროს მენეჯმენტმა სპეციალისტების მიერ მომზადებული შეფასების სისტემით იხელმძღვანელა.
გამოთავისუფლებული თანხებით მენეჯმენტი ტექნიკურ-მატერიალური ბაზის განახლებას გეგმავს. თუმცა გადაცემების სამ ზოლად დაყოფა და მათი ნაწილის დახურვა ჯერ მხოლოდ გეგმაა, რომელიც ახლა სამეურვეო საბჭომ უნდა განიხილოს.
გადაწყვეტილების მიღებამდე საბჭოში აზრთა სხვადასხვაობაა. წევრთა ნაწილის აზრით, მაუწყებლის ხელმძღვანელობამ საბჭოს მიერ გუშინ წარმოდგენილი შეფასების ოთხი კრიტერიუმიდან მხოლოდ ნაწილი გაითვალისწინა.
მწვავეა რეაქციები იმ გადაცემების ავტორების მხრიდანაც, რომლებიც შესაძლოა ეთერში აღარ გავიდეს.