საზოგადოებრივი მაუწყებლის პირველი არხის სატელიტური სიგნალის გავრცელებას კომპანია „აზერკოსმოსი“ უზრუნველყოფს.
შესაბამისი გარიგების შესახებ ნებართვა გენერალურმა დირექტორმა სამეურვეო საბჭოსგან დღეს მიიღო.
როგორც ვასილ მაღლაფერიძის სამსახურებრივი ბარათიდან ირკვევა, გარიგების ღირებულება საზოგადოებრივი მაუწეყებლის ბიუჯეტის 1%-ს აღემატება, თუმცა სხვა დეტალები უცნობია.
მენეჯმენტში ამბობენ, რომ ჯერ მხოლოდ სამუშაო პროცესი მიმდინარეობს და ხელშეკრულების საბოლოო ვერსია არ არსებობს.
სამეურვეო საბჭოს წევრმა სულხან სალაძემ „აზერკოსმოსის“ მომსახურების შეძენის შესახებ გადაწყვეტილებას მხარი არ დაუჭირა. მისი თქმით, მაუწყებელს ამ საკითხზე მსჯელობისთვის დრო კიდევ ჰქონდა, ამ პერიოდში კი ცხადი გახდებოდა ბაზრის სხვა მსხვილი მოთამაშეების გადაწყვეტილების შესახებაც.