საზოგადოებრივი მაუწყებლის სამეურვეო საბჭო საერთაშორისო კომპანია „თი-ენ-ესს“ წერილობით განცხადებას გაუგზავნის, რომლის მიხედვითაც, საბჭო კომპანიისგან 2016 წლის 8 ოქტომბრის საპარლამენტო არჩევნებისას მომზადებული ეგზიტპოლებისა და ცენტრალური სააარჩევნო კომისიის შედეგებს შორის არსებული მკვეთრი ცდომილების შესახებ პასუხებს მოითხოვს.

გადაწყვეტილება სამეურველო საბჭოს წევრებმა დღევანდელ სხდომაზე მიიღეს. სხდომაზე განიხილებოდა საკითხი, უნდა გადაუხადოს თუ არა მაუწყებელმა კომპანიას კონტრაქტით ნაკისრი თანხა, დაახლოებით 76 ათას ევრო ,მაშინ როდესაც კონტრაქტის პირობებით ეგზიტპოლებსა და შედეგებს შორის მაქსიმალურ სხვაობად 2 პროცენტი იყო დასახელებული, თუმცა რეალურად სხვაობა ბევრად მეტი იყო.

სამეურვეო საბჭოს წევრები თანხმდებიან, რომ კომპანიამ ნაკისრი ვალდებულება არაჯეროვნად შეასრულა. რაც შეეხება კონკრეტულ საბოლოო გადაწყვეტილებას, გადაუხდის თუ არა საზოგადოებრივი მაუწყებელი კომპანიას თანხას, სამეურვეო საბჭო მას შემდეგ მიიღებს, რაც კომპანია სამეურვეო საბჭოს წერილს უპასუხებს.

ამ დროის მონაცემებით, კომპანია „თი-ენ-ესში" საზოგადოებრივი მაუწყებლის მხრიდან გაგზავნილია ორი წერილი, ბოლო წერილი 4 აპრილს გაიგზავნა,სადაც ნათქვამია,რომ მაუწყებელი არ აპირებს თანხის გადახდას.

კომპანიის მხრიდან კი არჩევნების შემდეგ მხოლოდ ერთი ოფიციალური დოკუმენტია შემოსული მაუწყებელში - ინვოისის სახით.

რა პასუხს გასცემს კომპანია "თი-ენ-ესი" სამეურვეო საბჭოს წერილს, ამაზე იქნება დამოკიდებული, მივა თუ არა დავა სასამართლომდე.