გალში ინციდენტების პრევენციისა და მათზე რეაგირების მექანიზმის მორიგი შეხვედრა უკვე დასრულდა.
სახელმწიფო უსაფრთხოების სამსახურის ანალიტიკური დეპარტამენტის უფროსის მოადგილის კახაბერ ქემოკლიძის განცხადებით, შეხვედრაზე დრანდის ციხეში მყოფი გიორგი ლუკავას შესახებაც იყო საუბარი. მან ამის შესახებ ლუკავას მეუღლეს, ლალი ბასარიას განუცხადა, რომელიც ადგილზე იყო მისული.
ბასარიამ განაცხადა, რომ მისი მეუღლე უკვე 55 დღეა, შეწყალებულია, თუმცა მისი გადმოცემა ვერ ხერხდება. თუმცა, როგორც ქემოკლიძემ აღნიშნა, შეხვედრისას დე ფაქტო ხელისუფლების წარმომადგენლებმა ეს ინფორმაცია უარყვეს. მათივე თქმით, ლუკავას ე.წ. შეწყალება ან მისი ვინმეში გაცვლა არ იგეგმება. ლუკავას მეუღლემ აღნიშნულთან დაკავშირებით პრეტენზია გამოთქვა.
ამასთან, როგორც სუს-ის ანალიტიკური დეპარტამენტის უფროსის მოადგილეს კახაბერ ქემოკლიძემ ჟურნალისტებს განუცხადა, ცენტრალური ხელისუფლების წარმომადგენლებმა შეხვედრაზე კიდევ ერთხელ დააყენეს 2016 წლის 19 მაისს, ზუგდიდის რაიონის სოფელ ხურჩაში საქართველოს მოქალაქის გიგა ოთხოზორიას მკვლელობის საკითხი და ბრალდებული პირის - რაშიდ კანჯი ოღლის დაკავების აუცილებლობაზე ისაუბრეს. საუბარი შეეხო განმუხურში დაკავებული დავით ცერცვაძის საკითხს.
შეხვედრაზე, ასევე, საუბარი შეეხო საოკუპაციო ხაზზე ე.წ. გამშვები პუნქტების დახურვის საკითხსაც.