ნაციონალურ საკალათბურთო ასოციაციაში, პლეი-ოფის კონფერენციების ნახევარფინალური ეტაპი დაიწყო.

აღმოსავლეთში მოქმედმა ჩემპიონმა კლივლენდ კავალიერსმა სერია გამარჯვებით გახსნა. ტაირონ ლიუს გუნდმა საკუთარ "ქიქენ ლოანს არენაზე" "ტორონტო რეპტორზი", ანგარიშით 116-105 დაამარცხა.

აღსანიშნავია, რომ ბოლო მეოთხედის წინ მასპინძლები 22 ქულით იგებდნენ და გადამწყვეტი მეოთხედი ფორმალობად იქცა.

კავალერებში, როგორც მოსალოდნელი იყო, ლებრონ ჯეიმსი გამოირჩეოდა. გუნდის ლიდერმა 35 ქულა და 10 მოხსნა მოიპოვა. წყვილის მეორე თამაში ზეგ ისევ კლივლენდში ჩატარდება.

დასავლეთ კონფერენციაში მოულოდნელად, დიდი სხვაობით დამარცხდა სან ანტონიო სფერსი. გრეგ პოპოვიჩის გუნდმა ნახევარფინალური სერიის პირველი მატჩი საკუთარ "ეი-თი-ენდ-თი ცენტრში" "ჰიუსტონ როკეტსთან" 99-126 წააგო.

უნდა აღინიშნოს, რომ სტუმრებმა 22 სამქულიანი ჩააგდეს. პირველ ტაიმში "როკეტსმა" 30 ქულიან უპირატესობას მიაღწია და ბუნებრვია, "სფერსმა" თამაშის შემოტრიალება ვეღარ შესძლო.

გამარჯვებულ გუნდში, საუკეთესო 23 ქულით, ტრევორ არიზა გახლდათ. ჯეიმს ჰარდენმა კი, 20 ქულა და 14 შედეგიანი გადაცემა მიითვალა აქტივში. "ჰიუსტონი" სერიაში დაწინაურდა. ზეგ ეს გუნდები, ისევ სან ანტონიოში შეხვდებიან ერთმანეთს.