საქართველოს პრემიერ-მინისტრი გიორგი კვირიკაშვილი ამ წუთებში თეთრ სახლში ამერიკის შეერთებული შტატების ვიცე-პრეზიდენტს, მაიკ პენსს ხვდება. ამის შესახებ „მოამბის“ კორესპონდენტი ვაშინგტონიდან იუწყება.
მხარეები ორი ქვეყნის სტრატეგიული პარტნიორობის ძირითად საკითხებს და თანამშრომლობის სამომავლო პერსპექტივებს განიხილავენ.
საქართველოს პრემიერ-მინისტრი ამერიკის შეერთებულ შტატებში სამდღიანი ოფიციალური ვიზიტით სწორედ მაიკ პენსის მიწვევით იმყოფება. პენსმა კვირიკაშვილი მიუნხენის კონფერენციაზე შეხვედრისას მიიწვია შეერთებულ შტატებში.
როგორც საქართველოს დელეგაციის წევრები აცხადებენ, აშშ-ში დაგეგმილ შეხვედრებზე ერთ-ერთი მთავარი თემა რუსეთი იქნება.
დელეგაციის წევრების შეფასებით, საქართველოს ხელისუფლებას აშშ-ის ახალ ადმინისტრაციასთან აქტიური დღის წესრიგი აქვს. საგარეო საქმეთა მინისტრ მიხეილ ჯანელიძის განცხადებით, განხილული იქნება ისეთი თემები, როგორიცაა საქართველოს ინსტიტუციური და დემოკრატიული განვითარება, თანამშრომლობა თავდაცვის, უსაფრთხოებისა და ეკონომიკის სფეროებში.