„პატიმრობით ნუ ვსჯით უდანაშაულო ადამიანებს“, „ვგმობთ შერჩევით სამართალს“, - ამ ლოზუნგით ბათუმის საქალაქო სასამართლოსთან საპროტესტო აქცია 11-12 მარტის მოვლენებთან დაკავშირებით დაკავებული პირების ოჯახის წევრებმა გამართეს.

დღეს 15:00 საათზე დაკავებულთა საქმის განხილვა უნდა გაგრძელდეს. ახლობლები პატიმრობის გირაოთი შეცვლას მოითხოვენ. იგივე პოზიციას იზიარებენ ადვოკატები.

„არ არსებობს საქმეში არანაირი საუძველი იმისთვის, რომ დაკავებულები წინასწარ პატიმრობაში იმყოფებოდნენ, ჩვენ კიდევ ერთხელ დავაყენებთ აღმკვეთი ღონისძიების შეცვლის შუამდგომლობას“, - განაცხადა ერთ-ერთი დაკავებულის, გოდერძი გორგილაძის ადვოკატმა ზაზა პაპიძემ.

პროკურატურამ მზადყოფნა გამოთქვა დაკავებულებთან საპროცესო შეთანხმების გაფორმების თაობაზე, მხოლოდ იმ შემთხვევაში, თუ ისინი მინიმუმ 2-წლიან პატიმრობას და 3-წლიან პირობით მსჯავრს დათანხმდებიან, თუმცა ეს წინადადება მიუღებელია, როგორც ადვოკატებისთვის, ასევე დაკავებულთა ახლობლებისთვის.