საკონსტიტუციო სასამართლოში ე.წ. მოსმენების კანონის განხილვა მიმდინარეობს. განხილვა პარლამენტის ინტერესების დამცველთა გამოსვლებით გრძელდება.
პარლამენტის წარმომადგენლები კატეგორიულად არ ეთანხმებიან მოსარჩელეთა პოზიციას იმასთან დაკავშირებით, რომ ოპერატიულ-ტექნიკური სააგენტო, რომელიც ამჟამად ფლობს ე.წ მოსმენების გასაღებს, სახელმწიფო უსაფრთხოების სამსახურის დაქვემდებარებაშია.
მათი მტკიცებით, კანონმდებლებმა სააგენტოს დამოუკიდებლობის გარანტიები ახალ კანონში სრულად გაითვალისწინეს. სახელმწიფო უსაფრთხოების სამსახურის ხელმძღვანელი ერთპიროვნულად ვერც ნიშნავს და ვერც ათავისუფლებს სააგენტოს ხელმძღვანელს, გარდა ამისა, სააგენტო ფინანსურადაც დამოუკიდებელია, რაც მისი მიუკერძოებლობის ერთგვარი მნიშვნელოვანი ბერკეტია“, - აცხადებენ პარლამენტის წარმომადგენლები.
გარდა ამ გარანტიებისა, ისინი მიიჩნევენ, რომ ახალი კანონით სააგენტოს საქმიანობაზე მნიშვნელოვნად გაიზარდა პერსონალურ მონაცემთა დაცვის ინსპექტორის კონტროლის მექანიზმი.
მოსმენების კანონთან დაკავშირებულ სარჩელებზე საკონსტიტუციო სასამართლოს პლენუმი უკვე სამი საათია მსჯელობს. მოსამართლეებმა უკვე მოისმინეს მოსარჩელეთა არგუმენტები.