ცეკვის საბავშვო ანსამბლ „ლამპრების“ წევრებმა და მათი მშობლების ნაწილმა საქართველოს საზღვარი უკვე გადმოკვეთეს. ისინი საქართველოში აჭარის მთავრობის თავმჯდომარე ზურაბ პატარაძის თანხლებით დაბრუნდნენ.

როგორც საზოგადოებრივის კორესპონდენტი ადგილიდან იუწყება, საქართველოში ანსამბლის წევრი 26-ვე ბავშვი დაბრუნდა. სარფში მათ ახლობლები დახვდნენ.

საზოგადოებრივის კორესპონდენტის ინფორმაციით, მანამდე სამართალდამცველებმა დაშავებულთა ჩვენებები მოისმინეს და სწორედ ეს გახდა შეყოვნების მიზეზი.

ტრაპიზონთან მომხდარი ავარიის დროს დაშავებული ქართული ცეკვის ანსამბლის წევრების და მათი მშობლების ნაწილს სხვადასხვა დაზიანება აღენიშნება, მათ შორის მოტეხილობები და დაჟეჟილობები.

ავტოავარიის შედეგად დაშავებული ბავშვების მდგომარეობა სტაბილურია.

ამ დროისთვის თურქეთის კლინიკებში ავტოავარიის დროს დაშავებული რამდენიმე ადამიანი რჩება.

შეგახსენებთ, ავტობუსი, რომელსაც ქართული ცეკვის ანსამბლ „ლამპრების“ წევრები გადაჰყავდა, ავარიაში მოყვა.

საქართველოს საგარეო საქმეთა სამინისტროს ცნობით, ავტოსაგზაო შემთხვევა გირესუნის მახლობლად (120 კმ. ტრაპიზონიდან და 320 კმ. სარფიდან) მოხდა.

ავარიის შედეგად, 38 ადამიანი დაშავდა.