აჭარის ჯანდაცვის მინისტრის ზაალ მიქელაძის ინფორმაციით, ამ დროისთვის, თურქეთის საავადმყოფოებში ტრაპიზონთან მომხდარი ავარიის შედეგად დაშავებული საქართველოს ხუთი მოქალაქე რჩება.

სამშობლოში დღეს გამოემგზავრნენ დედა-შვილი, რომლებიც ამბულატორიული ზედამხედველობის ქვეშ იმყოფებოდნენ.

ხუთიდან ერთი დაშავებული, რომელიც ასევე ამბულატორიულ მკურნალობას გადის, საავადმყოფოს, სავარაუდოდ, დღესვე დატოვებს.

დანარჩენ ოთხ პაციენტს კი სტაციონარული მკურნალობის გაგრძელება კიდევ რამდენიმე დღეს მოუწევს. მათ შორის არის ქალი, რომელსაც კიდურის ამპუტაცია დასჭირდა. ასევე - ანსამბლის ხელმძღვანელი, რომელსაც სხვა დაზიანებებთან ერთად, ნეკნები აქვს ჩამტვრეული და - ქალბატონი ბარძაყის ძვლის მოტეხილობით და ოპერატორი, რომელიც რეანიმაციაში ხელოვნური სუნთქვის აპარატზეა შეერთებული, მისი მდგომარეობა სტაბილურად მძიმეა.

თურქეთში ავტობუსი, რომელსაც ქართული ცეკვის ანსამბლ „ლამპრების“ წევრები გადაჰყავდა, ავარიაში მოჰყვა.

საქართველოს საგარეო საქმეთა სამინისტროს ცნობით, ავტოსაგზაო შემთხვევა გირესუნის მახლობლად (120 კმ. ტრაპიზონიდან და 320 კმ. სარფიდან) მოხდა.

ავარიის შედეგად 38 ადამიანი დაშავდა.