განათლების სამინისტრო ყირიმში ქართველი მოსწავლეების გამგზავრების ფაქტს ეხმიანება. ჯეჯელავას უწყების შეფასებით, ცნტრ „არტეკში“ წასვლა სკოლის ადმინისტრაციის ან ერთი კონკრეტული მასწავლებლის გაუთვითცნობიერებელი გადაწყვეტილება იყო, რის გამოც მოსწავლეები რუსეთის მიერ ანექსირებულ ყირიმში მოხვდნენ.
ოფიციალურ განცხადებაში ნათქვამია, რომ სამინისტრო გმობს რუსეთის მიერ ყირიმის ანექსიას და სკოლის ადმინისტრაციას, პედაგოგებს მოუწოდებს, მომავალში მეტად ინფორმირებული და ჩართული იყვნენ სკოლის შიდა და გარე პროცესებში.
შეგახსენებთ, 146-ე საჯარო სკოლის ექვსი მოსწავლე ყირიმში, საბავშვო ცენტრ “არტეკში” გაემგზავრა. გავრცელებული ინფორმაციით, ოკუპირებულ ტორიტორიაზე ბავშვების ჩასვლის მიზეზი რუსული ენის შესწავლა იყო.
„მოამბემ“ სკოლის დირექტორთან დაკავშირება ვერ შეძლო, მისი მოადგილე კი აცხადებს, რომ მომხდარის შესახებ არ იცის და საკითხით დაინტერესდებიან.
“არტეკში” საერთაშორისო შეკრების ორგანიზებას რუსეთის ხელისუფლების სახელით რუსული ენის საბჭო ახორციელებს.