16 და 17 სექტემბერს ეროვნულ საფეხბურთო ლიგაში 26-ე ტურის მატჩები გაიმართება. ტური დღეს სამტრედიაში დაიწყება. "ეროსი მანჯგალაძეზე" "სამტრედია" თბილისის "ლოკომოტივს" 16:00 საათზე უმასპინძლებს. იმერლები 48 ქულით მესამე ადგილზე არიან, "ლოკომოტივი" კი 42 ქულით მეოთხეზეა და სამეულში მოსახვედრად ერთმანეთის კონკურენტები არიან.

დღესვე ბათუმის "რაგბი არენაზე" ლიგის ერთ-ერთი აუტსაიდერი "დინამო" სამეულში მოხვედრის კანდიდატს ქუთაისის "ტორპედოს" 20:00 საათზე უმასპინძლებს. ბოლო ტურში ორივე გუნდი დამარცხდა და სატურნირო მდგომარეობა მეტოქეებს ავალდებულებს, რომ მოსაგებად ითამაშონ.

17 სექტემბერს 3 მატჩი ჩატარდება: 16:30 საათზე, ივანწმინდას ცენტრალურ სტადიონზე, საჩხერეს "ჩიხურა" ფოთის "კოლხეთს" ეთამაშება - იმერული კლუბი სამეულისთვის იბრძვის, ხოლო კოლხები 19 ქულით მეცხრე ადგილზე იმყოფებიან. ორივესთვის ახლა თითოეულ ქულას დიდი მნიშვნელობა აქვს - ფოთელები კი წარმატების მიღწევას ახალი მთავარი მწვრთნელის, ალექსანდრე შტელინის ხელმძღვანელობით შეეცდებიან.

ბათუმის "რაგბი არენაზე" ტურის კიდევ ერთ შეხვედრაში ერთმანეთს აუტსაიდერები დაუპირისპირდებიან: გორის "დილას" მიიღებს ქობულეთის "შუქურა", რომელმაც წინა ტურში, თბილისში "დინამოს" ქულა წაართვა - 1:1. ქობულეთელები 12 ქულით ბოლო ადგილზე არიან, ხოლო "დილა" 25 ქულით მერვეზეა - გუნდების სატურნირო მდგომარეობა საინტერესო თამაშის წინაპირობა უნდა იყოს.

ტური კვირას, 20:30 საათზე "დინამო არენაზე" დასრულდება - გათამაშების ლიდერი თბილისის "დინამო" "საბურთალოს" მიიღებს. გიორგი ჩაკვეტაძის წასვლის შემდეგ "დინამო" დამაჯერებლად ვერ გამოიყურება, საბურთალოელებს კი ბოლო ექვსი ტურია, არ წაუგიათ და სამეულში მოხვედრის თეორიულ შანსს ინარჩუნებენ.

"დინამო"-"საბურთალოს" შეხვედრის პირდაპირ ტელერეპორტაჟს მე-2 არხი 20:30 საათიდან შემოგთავაზებთ.