ამერიკის შეერთებული შტატების პრეზიდენტმა დონალდ ტრამპმა თეთრ სახლში საბერძნეთის პრემიერ-მინისტრ ალექსის ციპრასს უმასპინძლა. მხარეებს შორის განხილვის მთავარი თემა ორმხრივი სავაჭრო ურთიერთობები და ინვესტიციების საკითხი იყო.

პრესკონფერენციაზე დონალდ ტრამპმა განაცხადა, რომ საბერძნეთს დღეს მძიმე ეკონომიკური პერიოდი უდგას, თუმცა მას იმედი აქვს, რომ კრიზისს დროულად დაძლევს.

„საბერძნეთი ჩვეულ ფორმაში დროულად ჩადგება, მე ამის იმედი მაქვს, რადგან პრემიერ-მინისტრი ალექსის ციპრასი ყველაფერს აკეთებს ამისთვის. ჩვენ ბევრი ვისაუბრეთ ორმხრივ თანამშრომლობაზე, მე საბერძნეთს მადლობა გადავუხადე იმისთვის, რომ ამდენი წლის განმავლობაში ამერიკი შეერთებული შტატების ერთგულ პარტნიორად და მეგობრად რჩება“, - განაცხადა დონალდ ტრამპმა.

ალექსის ციპრასმა აღნიშნა, რომ საბერძნეთი მადლობელია სტრატეგიული თანამშრომლობის ფარგლებში ამერიკის შეერთებული შტატებისგან გაწეული თანადგომისთვის.

ვაშინგტონში ოფიციალური ვიზიტით ჩასულმა საბერძნეთის პრემიერ-მინისტრმა ალექსის ციპრასმა შეხვედრები გამართა საერთაშორისო სავალუტო ფონდის ხელმძღვანელებთან.

საბერძნეთმა ეკონომიკური კრიზისის დასაძლევად პირველი დახმარება ე.წ. ფინანსური სამეულისგან 2010 წელს მიიღო, მეორე კი 2012-ში.

დღეს ევროკომისიის, ევროპის ცენტრალური ბანკისა და საერთაშორისო სავალუტო ფონდისთვის დასაბრუნებელი ვალი 240 მილიარდ ევროს შეადგენს.

ბოლო საკრედიტო პაკეტი, რომელიც ოფიციალურმა ათენმა ევროკავშირისგან 2015 წლის ზაფხულში მიიღო, საბერძნეთის საგარეო ვალის რესტრუქტურიზაციასაც ითვალისწინებს. 50 მილიარდი ევროს ოდენობის დახმარების პაკეტი სამ წელზეა გაწერილი.