რამდენიმე დღეში ჩვენს ქვეყანაში ტარდება მნიშვნელოვანი არჩევნები, ადგილობრივი თვითმმართველობის არჩევნები, დარწმუნებული ვარ, რომ ეს არჩევნები იქნება მორიგი დასტური იმისა, რომ ჩვენს ქვეყანაში განხორციელებული დემოკრატიული რეფორმების, ცვლილებების შედეგად, ჩვეულებრივი პრაქტიკა გახდა თავისუფალი და სამართლიანი არჩევნების ჩატარება, - ამის შესახებ საქართველოს პრემიერ-მინისტრმა გიორგი კვირიკაშვილმა მთავრობის დღევანდელ სხდომაზე განაცხადა.
როგორც გიორგი კვირიკაშვილმა აღნიშნა, წინასაარჩევნო პროცესი იყო უპრეცედენტოდ მშვიდი, ყველა საარჩევნო სუბიექტს ჰქონდა თავისუფალი, მშვიდობიანი საარჩევნო კამპანიის ჩატარების საშუალება, რაც იმას მოწმობს, რომ "ქართული ოცნების" სახით, ქვეყანას მართავს პოლიტიკური გუნდი, რომლისთვისაც ძალიან მნიშვნელოვანია ქვეყანაში თავისუფალი და დემოკრატიული არჩევნების ჩატარება.
"სწორედ ამიტომ მინდა, რომ არჩევნებამდე ორი დღით ადრე მივმართო, პირველ რიგში, სახელმწიფო უწყებებს, მეორე რიგში პოლიტიკურ ძალებს და მესამე რიგში, მთლიანად საზოგადოებას, რომ ჩავატაროთ ეს არჩევნები ისე, რომ ეს იყოს ნამდვილად კიდევ ერთი წინგადადგმული ნაბიჯი საქართველოში ჭეშმარიტად ევროპული დემოკრატიის განმტკიცების გზაზე, რადგან ერთხელ და სამუდამოდ წარსულს ჩაბარდეს ძალადობრივი არჩევნები და საერთოდ დავიწყებული იქნას სიტყვა, რასაც ერქვა წარსულში გაყალბებული, ძალადობრივი არჩევნები, ეს არის ძალიან მნიშვნელოვანი და ვფიქრობ, ჩვენ ძალიან მნიშვნელოვანი ნაბიჯები გადავდგით ასეთი საქართველოსა და ასეთი დემოკრატიის შექმნის გზაზე", - განაცხადა გიორგი კვირიკაშვილმა.
მთავრობის მეთაურმა მოუწოდა სახელმწიფო უწყებებს, რომ არჩევნების დროს არ მისცენ საბაბი არავის, ერთი სიტყვა მაინც თქვან სახელმწიფო რესურსის გამოყენებაზე.
"მინდა, მოვუწოდო ჩვენს მომხრეებს და კიდევ ერთხელ ხაზი გავუსვა იმას, რომ ჩვენი ძლიერება არის სწორედაც განსხვავებული აზრის პატივისცემაში. ჩვენი უპირატესობა სწორედ ამაში მდგომარეობს და ამაშია ის დიდი განსხვავება და ცვლილება, რომელიც ქვეყანაშ განხორციელდა 2012 წელს და 2012 წლის შემდგომ ჩატარებულ ყველა არჩევნებში კიდევ ერთხელ დადასტურდა ეს ძალიან მნიშვნელოვანი ცვლილება. მჯერა, ჩვენი მოსახლეობა სათანადოდ აფასებს ამ ძალიან დიდ ტრანსფორმაციას, რომელიც ქვეყანაში განხორციელდა და დარწმუნებული ვარ, „ქართული ოცნების“ მიერ შექმნილი სრულიად სხვა რანგის და სხვა ხარისხის დემოკრატია ჩვენი მოსახლეობის მიერ სათანადოდ იქნება დაფასებული, როგორც ეს მოხდა გასული რამდენიმე არჩევნების განმავლობაში. ასევე მინდა, განსაკუთრებით მოვუწოდო სამართალდამცავებს და პოლიციას, მაქსიმალურად ყველაფერი გავაკეთოთ, რათა ნებისმიერი ძალადობის გამოვლინება იყოს პრევენციით აღკვეთილი, რათა არავის მიეცეს საბაბი, თქვას, რომ რაიმე ჩრდილი მიადგა ამ არჩევნებს. ეს არის ჩვენთვის ყველაზე მნიშვნელოვანი და დარწმუნებული ვარ, ყველა სტრუქტურა მაქსიმუმს გააკეთებს ამ მიმართულებით", - აღნიშნა პრემიერ-მინისტრმა.
მთავრობის მეთაურმა მოუწოდა მოსახლეობას, რომ მივიდნენ საარჩევნო უბანზე და გამოხატონ თავისი ნება, დააფიქსირონ არჩევანი, ეს მნიშვნელოვანია ქვეყნის განვითარებისთვის.
"ჩვენს ქვეყანაში, გატარებული ცვლილებების შედეგად, თანდათან უნდა განმტკიცდეს კავშირი ამომრჩევლის ნებასა და ხელისუფლების პასუხისმგებლობას შორის. ეს კავშირი არის ყველაზე მნიშვნელოვანი და სწორედ ეს კავშირია, რაც შექმნა ჩვენმა ხელისუფლებამ და დარწმუნებული ვარ, ეს არჩევნები იქნება ამის კიდევ ერთი ნათელი მაგალითი", - განაცხადა გიორგი კვირიკაშვილმა.