თვითმმართველობის არჩევნები გახლავთ ქართული დემოკრატიის მნიშვნელოვანი გამარჯვება, - ამის შესახებ საქართველოს პრემიერ-მინისტრმა გიორგი კვირიკაშვილმა განაცხადა.
პრემიერ-მინისტრმა საქართველოს მოსახლეობას მიულოცა არჩევნების მშვიდობიან, თავისუფალ გარემოში ჩატარება.
"მინდა, მთელ საქართველოს მივულოცო, რომ არჩევნები მშვიდობიან, თავისუფალ გარემოში ჩატარდა, ეს არსი დემოკრატიისკენ გადადგმული კიდევ ერთი უმნიშვნელოვანესი ნაბიჯი, მადლობა მინდა გადავუხადო თითოეულ ამომრჩეველს აქტივობისთვის და მაღალი სამოქალაქო კულტურისთვის. ჩვენმა პოლიტიკურმა ძალამ "ქართულმა ოცნებამ" ბიძინა ივანიშვილის ხელმძღვანელობით 2012 წლიდან საბოლოოდ შეცვალა ჩვენს ქვეყანაში არჩევნების არსი და არჩევანის უფლება დაუბრუნა ხალხს. სწორედ ქართული ოცნების პოლიტიკური ნებაა არჩევნები სამართლიან, მშვიდობიან და კონკურენტულ დემოკრატიულ გარემოში ჩატარება. პარტია “ქართული ოცნება“ ამ დროისთვის არსებული წინასწარი მონაცემებით, დიდი უპირატესობით ლიდერობს. ასევე დიდი უპირატესობით ლიდერობს კახა კალაძე და მინდა, ყველას მოგილოცოთ. ეს არის თბილისი და თბილისელების გამარჯვება, ქართული ხალხის და ქართული სახელმწიფო გამარჯვება, ველოდებით ცესკო-ს საბოლოო შედეგებს, რომელიც დარწმუნებული ვარ, დაადასტურებს “ქართული ოცნების" გამარჯვებას", - აღნიშნა პრემიერ-მინისტრმა.
მისივე თქმით, დღეს ამომრჩევლების უმრავლესობამ ხმა მისცა იმ პოლიტიკურ ძალას, რომელმაც ბოლო 5 წლის განმავლობაში ბევრი რამ გააკეთა საქართველოსთვის და წინ კიდევ უფრო მასშტაბური გეგმები გვაქვს.
"მადლობა მხარდაჭერისთვის, ჩვენ გვესმის, რომ ეს არის უდიდესი პასუხისმგებლობა და მინდა იცოდეთ, რომ თითოეული ჩვენგანი ძალისხმევას ამ ნდობის განსამტკიცებლად მიმართავს. მადლობა ადგილობრივ და საერთაშორისო დამკვირვებლებს. ეს არჩევნები გახლავთ ქართული დემოკრატიის მნიშვნელოვანი გამარჯვება, ყველას გილოცავთ ჩვენი ქვეყნის და ჩვენი ხალხის მნიშვნელ9ოვან გამარჯვებას", - განაცხადა გიორგი კვირიკაშვილმა.