თავდაცვის მინისტრის პირველმა მოადგილემ საქართველოში სლოვაკეთის რესპუბლიკის ელჩს, რუდოლფ მიხალკასა და თავდაცვის ატაშეს, პოლკოვნიკ ივან კმეტს უმასპინძლა. გაცნობითი ხასიათის შეხვედრაზე ლელა ჩიქოვანმა პოლკოვნიკ ივან კმეტს თანამდებობაზე დანიშვნა მიულოცა და საქართველოში წარმატებული საქმიანობა უსურვა.
სლოვაკმა დიპლომატებმა საქართველოს ტერიტორიული მთლიანობის მიმართ და ევროატლანტიკურ სტრუქტურებში ინტეგრაციის გზაზე მტკიცე მხარდაჭერა გამოხატეს და თავდაცვის სფეროში თანამშრომლობის გაღრმავების სურვილი გამოთქვეს.
ლელა ჩიქოვანმა მათ თავდაცვის უწყებაში განხორციელებული და მიმდინარე რეფორმები გააცნო და ამ კონტექსტში საერთაშორისო პარტნიორების მხარდაჭერის მნიშვნელობა ხაზგასმით აღნიშნა.
ნატო-საქართველოს არსებითი პაკეტის (SNGP) განხორციელების პროცესზე საუბრისას, მინისტრის მოადგილემ სლოვაკეთის მხარეს გაწეული დახმარებისა და ექსპერტის მოვლინებისთვის მადლობა გადაუხადა.
შეხვედრაზე საუბარი შეეხო ასევე, სამხედრო განათლების კუთხით თანამშრომლობის საკითხებსა და გამოცდილების გაზიარებას.