ლიტერატურული გადაცემა „წახნაგები“ რუბრიკით „პრემია“ გთავაზობთ საუბარს 2011 წლის ბუკერის პრემიის ლაურეატის, თანამედროვეობის უდიდესი ინგლისელი მწერლის, ჯულიან ბარნსის რომანზე „დასასრულის განცდა“, რომელსაც ქართველი მკითხველი კარგად იცნობს „დიოგენეს“ მიერ გამოცემული ზაზა ჭილაძისეული უბრწყინვალესი თარგმანით. თარგმანზე უნდა ითქვას, რომ შთაბეჭდილება ისეთია, ეს წიგნი ქართველმა ავტორმა ბარნსმა თავიდანვე ქართულად დაწერა, ოღონდ რაღაც აკვიატებით თავის გმირებს ტონი უებსტერი და ედრიენ ფინი დაარქვა. წიგნს ერთი მთხრობელი ჰყავს, რომელიც მისი პროტაგონისტიცაა – ენტონი უებსტერი და იგი ორ დროზე მოგვითხრობს: ახლანდელზე, რომელშიც იგი სამოცდარამდენიმე წლისაა და ორმოცირაღაც წლის წინანდელზე, როდესაც იგი ჯერ ვაჟთა სკოლის მოსწავლე და შემდეგში უნივერსიტეტის სტუდენტი იყო. წარსულზე საუბარი მას თავად არ მონდომებია, წარსულმა იგი თვითონ მოიხმო, როდესაც ყოფილი სატრფოს დედამ მას მოულოდნელად ანდერძით ხუთასი ფუნტი და, რატომღაც, მეგობრის დღიური დაუტოვა. რატომ გვეგონა, რომ გვესმოდა, რა მოხდა წარსულში, რა საიდუმლოს მალავდნენ საყვარელი ქალი და მისი დედა, რატომ მოიკლა თავი ყველაზე ნიჭიერმა და გამორჩეულმა მეგობარმა, რატომ გვრცხვენია წარსულში გადადგმული ზოგიერთ ნაბიჯის – ყველაფერ ამაზე იქნება საუბარი გადაცემაში.