საქართველოში მოსწავლეთა აკადემიური მიღწევები საბუნებისმეტყველო საგნებში, მათემატიკასა და წიგნიერებაში მნიშვნელოვნად ჩამორჩება საშუალო ნიშნულს. ამას საერთაშორისო კვლევებისა და სახელმწიფო შეფასების შედეგები ადასტურებს. განსხვავებულია მოსწავლეთა მიღწევები სკოლის ტიპის, ადგილმდებარეობის, ეთნიკური მიკუთვნებულობის თუ სხვა ნიშნის მიხედვით. მაგალითად, სოფლის სკოლებს უარესი შედეგები აქვთ ვიდრე ქალაქისას; საჯარო სკოლების მოსწავლეთა შედეგები კი ჩამორჩება კერძო სკოლის მოსწავლეთა შედეგებს;

საქართველოში 2000-ზე მეტი სკოლაა. სკოლებს განსხვავებული გამოწვევები და საჭიროებები აქვთ, იქნება ეს სასწავლო პროცესის მართვა, პედაგოგების კვალიფიკაცია, სასწავლო რესურსები, ინფრასტრუქტურა თუ სხვა. შეიძლება ითქვას, რომ ეს ფაქტორები მოსწავლეთა აკადემიურ მიღწევებზეც განსხვავებულ გავლენას ახდენს. განსხვავებულია მიდგომები, მეთოდები, ფასები და უზრუნველყოფა.

შეიძლება თუ არა სკოლა იყოს ბიზნესი, ამ თემაზე განათლების სპეციალისტები ხშირად დაობენ. შესაძლოა, ერთი ადამიანისგან მეორესთვის ცოდნის გადაცემა მართლაც სოციალური ურთიერთობა იყოს და არა ბიზნესურთიერთობა, მაგრამ ისიც გასათვალისწინებელია, რომ კერძო სკოლაში მშობელი შვილისთის მხოლოდ ცოდნას არ ყიდულობს. განათლებასთან ერთად, მშობლებს კერძო სკოლები სხვა უამრავ „ბენეფიტს“ სთავაზობენ. უკეთეს ინფრასტრუქტურას, უკეთეს გარემოს, მათზე მორგებულ გრაფიკს, უსაფრთხოების გამკაცრებულ ზომებს და ა.შ. საბოლოოდ კი კერძო სკოლებში საჯაროსგან განსხვავებით მოსწავლის მშობლებთან ურთიერთობა ხელშეკრულებით რეგულირდება და მხარეების მიერ ნაკისრი ვალდებულებების შეუსრულებლობა, როგორც სხვა ბიზნესკომპანიებში კონტრაქტის შეწყვეტით სრულდება.

სტუმრები: მეგი კავთუაშვილი - bm.ge-ს რეპორტიორი;
რეზო აფხაზავა - "განათლების პოლიტიკის, დაგეგმვისა და მართვის საერთაშორისო ინსტიტუტის" აღმასრულებელი დირექტორი;
გიორგი მელაძე - "ნიუტონის თავისუფალი სკოლის" დირექტორი და დამფუძნებელი ;
მანანა სანაძე - "UG სკოლა" დირექტორი
27.03.2018