- რუსმა ოკუპანტებმა გორის რაიონში მამაკაცი გაიტაცეს. როგორც თვითმხილველები ყვებიან, ლაშა გლურჯიძე სოფელ ბერშუეთთან დააკავეს, კიდევ ერთმა ახალგაზრდამ, საბა სეხნიაშვილმა კი გაქცევა შეძლო.
ადგილობრივების ინფორმაციით, ახალგაზრდები ეკლესიაში იმყოფებოდნენ, რომელიც საქართველოს ცენტრალური ხელისუფლების მიერ კონტროლირებად ტერიტორიაზეა და მათ ე.წ. საზღვარი არ დაურღვევიათ.
- დიდთოვლობის გამო საავტომობილო გზებზე მოძრაობის სპეციალური რეჟიმია დაწესებული. მცხეთა–სტეფანწმინდა–ლარსის საავტომობილო გზის გუდაური–კობის მონაკვეთზე ქარბუქისა და ზვავსაშიშროების გამო, იკრძალება ყველა სახის ავტოტრანსპორტის მოძრაობა. გარდა ამისა, დიდთოვლობისა და ზვავის გამო ამ დროისთვის შეჩერებულია მოძრაობა ჯვრის უღელტეხილზე.
- საქართველოს პრეზიდენტის სასახლეში საახალწლო ღონისძიება გაიმართა. პრეზიდენტის ნაძვის ხეზე გიორგი მარგველაშვილმა და მაკა ჩიჩუამ თბილისის დღის ცენტრებიდან შეზღუდული შესაძლებლობის მქონე ბავშვებს უმასპინძლეს.