- ტელეკომპანია ტაბულას თანამშრომლები, რომლებსაც გუშინ საღამოს უცნობი პირები დაესხნენ თავს პროკურატურას დაზარალებულად ამ დრომდე არ უცვნია. ჟურნალისტებს გუშინ პოლიცია 7 საათზე მეტხანს კითხავდა, დღეს კი უკვე რამდენიმე საათია ვიდეოჩანაწერის დათვალიერებით ამოცნობის პროცესი მიმდინარეობს. ტაბულას საინფორმაციო სამსახურის უფროსს ნინო მაჭარაშვილს, ჟურნალისტებს, ირაკლი კიკნაველიძეს, ლევან სუთიძეს და ტაბულას ყოფილ თანამშრომელს, ავთო ქორიძეს, გუშინ საღამოს კოტე აფხაზის ქუჩაზე, რესტორან ჭაშნაგირში თავს დაესხნენ. ტაბულას ჟურნალისტის, ირაკლი კიკნაველიძის თქმით, რამდენიმე პირმა მათ სიტყვიერი და ფიზიკური შეურაცხყოფა მიაყენა და რესტორნის ინვენტარი დააზიანა. კიკნაველიძის თქმით, თავდამსხმელები მოტივად "ტაბულას მიერ ეკლესიის გინებას" ასახელებდნენ.
- სოკარის პრეზიდენტი თბილისშია.
ქართულმა მხარემ სოკარის წარმომადგენლებს გაზპრომის პირობები გააცნო.
კახა კალაძე ამბობს, რომ აზერბაიჯანულ მხარეს ტექნიკურად არ შეუძლია იმაზე მეტი მოცულობის გაზის მოწოდება, რასაც იგი ქვეყანას დღეისთვის აწვდის. კალაძის თქმით, სწორედ ამიტომ მიმდინარეობს მოლაპარაკებები რუსულ მხარესთან, სოკარ ჯორჯიას დირექტორი მაჰირ მამედოვი კი საპასუხოდ ამბობს, რომ აზერბაიჯანული მხარე გაზრდის იმ მილსდენის გამტარუნარიანობას, რომლითაც საქართველო მარაგდება.
- ევროპის საბჭოს ადამიანის უფლებათა კომისარი ნილს მუჟნიეკსი, საქართველოში ვიზიტის შემდეგ ანგარიშს აქვეყნებს და აღნიშნავს, რომ საქართველომ სასამართლო სისტემის გაძლიერება და დამოუკიდებლობის უზრუნველყოფა უნდა განაგრძოს.
ევროპის საბჭოს ადამიანის უფლებათა დაცვის კომისია საქართველოს ხელისუფლებას სასამართლო სისტემის გაუმჯობესებისკენ მოუწოდებს. კომისია შეშფოთებას გამოთქვამს იმ ბრალდებების გამო, რომელთა მიხედვითაც ხელისუფლება ბოროტად იყენებს კანონს ოპოზიციაზე პოლიტიკურად მოტივირებული დევნის განსახორციელებლად.