საკალათბურთო ევროლიგაში გუშინ ჯგუფური ეტაპის მე-11ტურის სამი შეხვედრა გაიმართა.
მადრიდის "რეალმა" საკუთარ დარბაზში კაუნასის "ჟალგირისი" მიიღო და დაძაბულ შეხვედრაში ხუთი ქულის სხვაობით, ამგარიშით 96-91 დაამარცხა.
უნდა აღინიშნოს, რომ მთელი მატჩის განმავლობაში სოლიდური სხვაობით დაწინაურებას ვერცერთი გუნდი ვერ ახერხებდა.
"რეალს" გუნდის ერთ-ერთი ლიდერი სერხიო ლიული აკლდა, თუმცა, მადრიდელებმა მაინც შეძლეს საჭირო გამარჯვების მოპოვება.
პაბლო ლასოს გუნდის შემადგენლობაში, საუკეთესო ლუკა დონჩიჩი იყო 17 ქულით.
სამეფო კლუბი სატურნირო ცხრილში მეორე ადგილზეა და მხოლოდ მოსკოვის "ცესკას" ჩამორჩება. არმიელებმა გუშინ, გასვლაზე "მილანი" 79-64 დაამარცხეს.
კიდევ ერთ დაპირისპირებაში "ფენერბაჰჩემ" სტამბოლში ბელგრადის "ცრვენა ზვეზდას" მოუგო, ანგარიშით 87-72.
დღეს ევროლიგის გათამაშებაში ტურის დარჩენილი ოთხი შეხვედრა ჩატარდება.