„ლივერპული", ინგლისის პრემიერლიგაში, წარმატებულ თამაშს განაგრძობს.

იურგენ კლოპის გუნდმა, გუშინ, საკუთარ ენფილდზე, „სტოკ სიტი" დიდი ანგარიშით 4-1 დაამარცხა.

აღსანიშნავია, რომ „მერსისაიდელები" მე-12 წუთზე მდევრის როლში აღმოჩნდნენ. სტოკი, ჯონათან უოლტერსმა დააწინაურა.

მასპინძლებმა 22 წუთში გაათანაბრეს, ზუსტად, ადამ ლალანამ დაარტყა. პირველი ტაიმის მიწურულს კი, რობერტო ფირმინომ, ჯეიმს მილნერის გადაცემის შემდეგ, ანგარიში 2-1 გახადა. მეორე ნახევარში, „ლივერპულმა" მეტოქეზე ზეწოლა კიდევ უფრო გააძლიერა და ორი უპასუხო ბურთი გაუტანა.

59-ე წუთზე, იმბულამ ავტოგოლი გაიფორმა, ხოლო შეხვედრას წერტილი, 70-ზე დანიელ სტარიჯმა დაუსვა. ეს „ლივერპულისთვის" ზედიზედ მეოთხე გამარჯვება იყო.

„მერსისაიდული" კლუბი 40 ქულით სატურნირო ცხრილში მეორე ადგილზეა და ლიდერ ლონდონის „ჩელსის" 6 ქულით ჩამორჩება.