მინისტრის მოადგილის, ბესიკ ამირანაშვილის შემდეგ შინაგან საქმეთა სამინისტროში უახლოეს დღეებში საკადრო ცვლილებები ისევ განხორციელდება. ამის შესახებ ინფორმაციას, ბათუმში 11-12 მარტის მოვლენებთან დაკავშირებით, სისხლის სამართლის საქმეზე დაკავებული პირების ადვოკატები, ზაზა პაპიძე და თენგიზ კახიძე ავრცელებენ.

მათი განცხადებით, საქართველოს შინაგან საქმეთა მინისტრის ყოფილი მოადგილის, ბესიკ ამირანაშვილის თანამდებობა ბათუმის მოვლენებს შეეწირა, რადგან იგი 11-12 მარტს ბათუმში იმყოფებოდა და პროცესებს არაეფექტურად ხელმძღვანელობდა.

"ბესიკ ამირანაშვილი კრიმინალური პოლიციის დეპარტამენტს ხელმძღვანელობდა. გაირკვა, რომ ეს პიროვნება შესაბამის მენეჯმენტს ვერ ახორციელებდა და ამიტომაც იყო ხარვეზები. ბათუმურ მოვლენებს ბესიკ ამირანაშვილს პირდაპირ ვუკავშირებთ. ასევე, მისი სახელი ფიგურირებს აზერბაიჯანელი ჟურნალისტის საქართველოდან გაქრობაშიც. ჩვენი ინფორმაციით, 11-12 მარტის მოვლენების დროს ბესიკ ამირანაშვილი ბათუმში იმყოფებოდა და პროცესები მის მიერ იყო მართული. მნიშვნელოვანია ისიც, რომ ამირანაშვილი ვიდრე მინისტრის მოადგილედ დაინიშნებოდა, მანამდე აჭარის პოლიციის სამმართველოს უფროსი იყო. მისი მმართველობის დროს კი, არაერთი უკანონო დაკავება განხორციელდა", -გააცხადა, ადვოკატმა ზაზა პაპიძემ.

შეგახსენებთ, რომ ბათუმში 11-12 მარტს აქციები მიმდინარეობდა. უკანონო პარკირებისთვის გამოწერილი ჯარიმით დაწყებული დაპირისპირება 40-მდე ადამიანის დაკავებით დასრულდა.