საკონსტიტუციო სასამართლოში ე.წ. მოსმენების კანონთან დაკავშირებით შესული საჩივრების განხილვის პროცესი განახლდა.

განმწესრიგებელი სხდომის მეორე დღე ექსპერტებს და ოპერატიულ-ტექნიკური სააგენტოს წარმომადგენლებს დაეთმობათ. ისინი სასამართლომ მოწმის სტატუსით დაიბარა და პლენუმის წევრები შეკითხვებს სისტემასთან დაკავშირებით დაუსვამენ.

დავის ძირითადი საგანია, უგულებელყო თუ არა პარლამენტმა ე.წ. მოსმენების შესახებ ახალი კანონის მიღებით საკონსტიტუციო სასამართლოს 2016 წლის 14 აპრილის გადაწყვეტილება, რომლითაც ანტიკონსტიტუციურად ცნო ე.წ. მოსმენების გასაღების ფლობა სახელმწიფო უსაფრთხოების სამსახურს დაქვემდებარებული დეპარტამენტის მიერ.

მოსარჩელეები ამტკიცებენ, რომ გასაღები ისევ სუს-ის ხელშია, რადგან ახლად შექმნილი ოპერატიულ-ტექნიკური სააგენტო, ფაქტობრივად, ისევ დარჩა უწყების დაქვემდებარებაში. პარლამენტის წარმომადგენლები კი ამტკიცებენ, რომ ახალ კანონში სააგენტოს დამოუკიდებლობის გარანტიები მყარად არის უზრუნველყოფილი.

განმწესრიგებელი სხდომა გუშინ გვიან ღამემდე გაგრძელდა. პლენუმი მხარეების არგუმენტებს ისმენდა. ე.წ. მოსმენების კანონთან დაკავშირებით, სახალხო დამცველთან ერთად, 326 სარჩელია შესული. მოსარჩელეთა პოზიციას იზიარებს პრეზიდენტი, რომელმაც სასამართლოს წერილობითი მოსაზრებითაც მიმართა.