ვენეციის კომისიის მიერ, საკონსტიტუციო ცვლილებებთან დაკავშირებით მიღებული საბოლოო დასკვნა, სავარაუდოდ, ოფიციალურ ვებგვერდზე დაიდება.

კომისიამ დასკვნა ვენეციაში პლენარულ სესიაზე, 6 ოქტომბერს დაამტკიცა. პრეზიდენტს საკუთარი პოზიციის დასაფიქრებლად 10 ოქტომბრამდე აქვს ვადა.

გამოიყენებს თუ არა გიორგი მარგველაშვილი ვეტოს ჯერ უცნობია. მმართველი გუნდი გიორგი მარგველაშვილისაგან მხოლოდ ორი შესწორების შეტანას ითხოვს. საუბარია ბონუსის გაუქმებასა და საარჩევნო ბლოკების ერთჯერადად დაშვებაზე. ოპოზიცია კი საკონსტიტუციო ცვლილებების პროექტში დამატებით სხვა შესწორებების შეტანას ითხოვს. კერძოდ, საუბარია საარჩევნო სისტემასა და პრეზიდენტის არჩევის წესზე.

რაც შეეხება ვენეციის კომისიის დასკვნას, დოკუმენტის მიხედვით, ცვლილებები მხოლოდ 44-ე და 55-ე მუხლებს შეეხო. დოკუმენტში ნათქვამია, რომ საკონსტიტუციო რეფორმების პროცესი საქართველოს პოლიტიკური სისტემის საპარლამენტო სისტემაზე გადასვლის პროცესს ასრულებს და წარმოადგენს პოზიტიურ ნაბიჯს ქვეყნის საკონსტიტუციო წესრიგის კონსოლიდაციისა და გაუმჯობესებისკენ.

ვენეციის კომისია მიესალმება საპარლამენტო უმრავლესობის მზადყოფნას, გადავიდეს ბონუს სისტემიდან პროპორციული განაწილების სისტემაზე იმ პარტიებისთვის, რომლებიც 5%-იან ბარიერს გადალახავენ.