ყაზახური „ყაზმუნაიგაზი“ და არაბეთის გაერთიანებული საემიროების Abu Dhabi Ports Company კასპიის და შავ ზღვებში ერთობლივ საზღვაო ფლოტს შექმნიან და სანაპირო ინფრასტრუქტურას განავითარებენ. სტრატეგიული პარტნიორობის შეთანხმებას მხარეებმა უკვე ხელი მოაწერეს. ამის შესახებ „ყაზმუნაიგაზის“ განცხადებაში არის ნათქვამი, რასაც ეკონომიკური პორტალი APA-Economics ავრცელებს.

დოკუმენტს ყაზახეთის პრეზიდენტ ყასიმ-ჟომარტ თოყაევმა არაბეთის გაერთიანებულ საემიროებში ვიზიტის დროს მოაწერა ხელი. მხარეები საერთაშორისო ფინანსურ ცენტრ „ასტანაზე“ დაფუძნებულ ერთობლივ საწარმოს შექმნიან, რომელიც კასპიის ზღვაში ნავთობისა და გაზის პროექტებისთვის საზღვაო მომსახურებას უზრუნველყოფს.

შეთანხმების თანახმად, ყაზახეთი და არაბეთის გაერთიანებული საემიროები კასპიის ზღვაში ოფშორული პროექტების მხარდასაჭერად სხვადასხვა ტიპის მცირე ზომის გემების, ასევე, ტანკერების ფლოტს შექმნიან, რისი მთავარი მიზანიც ყაზახური ნავთობის ექსპორტისთვის ალტერნატიული მარშრუტების შემუშავებაა. ალტერნატიული მარშრუტი აქტაუს პორტის გავლით აზერბაიჯანი-საქართველო-თურქეთი-ევროპის მიმართულებას გულისხმობს.

ამასთან, ყაზახეთი და არაბეთის გაერთიანებული საემიროები სავაჭრო ფლოტის შექმნის შესაძლებლობებს შეისწავლიან, რაც ტრანსკასპიური მარშრუტით ჩინეთიდან ევროპაში საკონტეინერო ბორნების მშენებლობას ან შეძენას ითვალისწინებს.


#ახალიამბები #BusinessMediaGeorgia