ზამთრის სეზონზე გრიპის ვირუსების შემთხვევების მატება არახალია, თუმცა ახლა ყურადღების ცენტრში ჩინეთია, სადაც ადამიანის მეტაპნევმოვირუსის (HMPV) შემთხვევები მატულობს, განსაკუთრებით ბავშვებში.

საავადმყოფოები გადატვირთულია, ქვეყნის მთავრობა კი სიტუაციის სამართავად სხვადასხვა ზომას იღებს. საზოგადოება ამას COVID-19-ის გავრცელებასაც ადარებს, თუმცა ექსპერტების თქმით, პანდემიის მოლოდინის საფუძველი არ გვაქვს. ჩინეთის დაავადებათა კონტროლის ცენტრმა 2 იანვარს ყოველკვირეული ანგარიში გამოაქვეყნა, რომელიც 23-იდან 29 დეკემბრამდე პერიოდში რესპირაციული ინფექციების გავრცელებას ასახავს. წინა კვირასთან შედარებით, HMPV-ს გავრცელება ამბულატორიულ პაციენტებში 0.1%-ით არის მომატებული; ჩინეთში ამ დროისთვის ყველაზე გავრცელებული ვირუსი ინფლუენცა, იგივე გრიპია. CDC მოსახლეობას ურჩევს, რომ ვირუსის პრევენციისათვის ჰიგიენური ნორმები დაიცვან. უწყება პარალელურად უარყოფს, რომ კოვიდპანდემიის მსგავსი საფრთხე არსებობს, ვითარებას კი სეზონური ტენდენციით ხსნის. ექსპერტების შეფასებით, HMPV ახალი ვირუსი არ არის, ის რამდენიმე ათწლეულია ცირკულირებს, ამიტომ მსოფლიოს მოსახლეობას მის მიმართ გარკვეული იმუნიტეტი უკვე გამომუშავებული აქვს.

მედიკოსების ინფორმაციით მეტაპნევმოვირუსი საქართველოშიც გავრცელებულია, თუმცა არანაირი საფუძველი იმის, რომ ეს ვირუსი განვიხილოთ როგორც მორიგი პანდემიური ვირუსი, არ არსებობს. რა უნდა ვიცოდეთ მეტაპნევმოვირუსზე, როგორ გადაეცემა ის, რა სიმპტომები და რამდენად რთული მიმდინარეობა ახასიათებს?

სტუმარი: ივანე ჩხაიძე - იაშვილის სახელობის ბავშვთა ცენტრალური საავადმყოფოს სამედიცინო დირექტორი

#ახალიამბები #BusinessMediaGeorgia