გრძელდება ნაციონალური საკალათბურთო ასოციაციის რეგულარული სეზონი. ბოლო პერიოდში საგრძნობლად მოუმატა დალას მავერიქსმა.
სან ანტონიო სფერსის დამარცხების შემდეგ რიკ კარლაილის გუნდმა დღეს მოქმედ ჩემპიონს კლივლენდ კავალიერსაც მოუგო.
"ემერიქან ეირლაინს" ცენტრში გამართულ შეხვედრაში მასპინძლები, ბოლო მეოთხედის წინ 11 ქულის სხვაობით იგებდნენ და საბოლოოდ 104-97 გაიმარჯვეს.
მავერიქსის შემადგენლობაში ორმაგი დუბლით გამოირჩა ჰარისონ ბარნსი, რომელმაც 24 ქულა და 11 მოხსნა გააკეთა.
კლივლენდში საუკეთესო ლებრონ ჯეიმსი გახლდათ. მეფემ 23 ქულა, 9 მოხსნა და 9 ზუსტი პასი მიითვალა აქტივში. ამ წაგების მიუხედავად, კავალერები აღმოსავლეთ კონფერენციაში კვლავ პირველ ადგილზე არიან. რაც შეეხება, დალასს, ტექსასური კლუბი, ჯერჯერობით პლეი-ოფის ზონაში არ იმყოფება.