მესიზმრა დღეს მომავალი:
რაღაც მინდორში დავრბოდი...
სადა ვარ მეთქი. მომიხმეს.
აქ, მომავალში გადმოდი.

შეხედე, ამ ტბის ადგილას
ადრე თეთნულდი იყო,
ამ ხეობაში ოდესღაც
უშბა აღმართულიყო...

აქ მყინვარწვერი იდგა,
აქ შხარა, აქ დარიალი,
აქ თრიალეთი ოდესღაც იწვა,
აქ იყო თერგის ღრიალი.

- მიწისძვრა იყო? - მიწისა - არა!
სულისძვრამ დაანგრია!
ქართველმა კაცმა თეთრი და შავი,
მტერი - მოყვარე, ლომი და რწყილი,
იავნანა და დედის გინება
რომ ვეღარ გაარჩია!

გადმოგცემთ: ასეთი იყო
ჩემი სიზმრის ნაამბობი:
კავკასიონის ქედს დაერქმევა
კავკასიონის დაბლობი.